લીકરથી લખપતિ કેમ થવાય? એક વ્યાવસાયિક માર્ગદર્શન

વડાપ્રધાન નરેન્દ્ર મોદીના કાર્યક્રમમાં નવસારી જતો હતો ત્યાં એક દોસ્તનો ફોન આવ્યો કે, યાર...દિકરાને કઇ લાઇનમાં મુકવો જોઇએ ? ભાર્ગવભાઇ સલાહ આપો ને. એન્જિનિયર થયેલા છોકરાઓ રખડે છે અને ડોક્ટર બનાવવાની સાલી હેસિયત નથી. એમ થાય કે, બે નંબરના ધંધે ચઢાવી દઉ, સાલી રૂપિયાની ધૂળધાણી તો નહીં.

મિત્રના આ ફોને મને વિચારતો કરી મૂક્યો. વાત તો સાચી છે ડોક્ટર બનવું હોય તો મીનીમમ રૂ. 25થી 30 લાખનો ખર્ચો..એન્જિનિયર કે એમબીએ થવું હોય તો પાંચથી છ લાખનો ખર્ચો. અને પછી સારા પગરાની કોઇ ગેરંટી નહીં. વિચારતો હતો કે દોસ્તને શું સલાહ આપવી ? ત્યાં નવસારી પહોંચ્યા, પી.એમની વિઝિટના પાસની પળોઝણ ચાલતી હતી ત્યાં બીજા પત્રકાર મિત્રો સાથે ચા પીતા પીતાં ગપ્પા મારતા હતાં. ત્યાં વાત નીકળી કે સુરત પાસસેના વરેલીમાં લઠ્ઠા કાંડ થયો છે તેમાં કેટલા મર્યા? અને દારૂનો ધંધો કેવી રીતે ચાલે છે? ત્યારે વાત કરતાં કરતાં ખબર પડી કે, વગર ઇન્કમટેક્સ રિટર્ન ભર્યે લખપતિ થવનાનો સારો રસ્તો ક્યો?

લીકર વેચીને લખપતિ થવામાં જબરી કેરિયર છે. સામાન્ય નોકરી લેવા જાવ તો માલિક ક્વોલિફિકેશન પૂછે. પરંતુ તમારે ગુજરાતમાં ક્યાંય દારૂનો ધંધો કરવો હોય તો લખપતિ બનવું આસાન છે. મિત્રો પાસેથી મળેલી માહિતિ પ્રમાણે આ કેરિયર બનાવવી સહેલી છે.

ભણતરઃ....આ ધંધાની શરૂઆત કરવા માટે ભણતરની જરૂર નથી. માતર પૈસા ગણતા આવડતું હોય તો ાસાનીથી આ ધંધામાં કિંગ થઇ શકાય છે. અહીં ગ્રેજ્યુએટની ડીગ્રીની જરૂર નથી. પરંતુ તમે શારિરિક રીતે થોડા સશક્ત હોવા જરૂરી છે.

ત્યારબાદ તમારે આસપાસના લોકલ પોલિસ સ્ટેશનમાં પોલિસ અધિકારીના લીકરના સ્પેશિયાલિસ્ટ કોન્સ્ટેબલનો સંપર્ક ગોઠવવો પડે. જેને પોલિસની ભાષામાં વહીવટદાર કહે છે.  આ વહીવટદારના આશિર્વાદ મેળવ્યા પછી મંદીરમાં જેમ પૂજાપો ચડાવો છો તેમ આ વહીવટદારને પૈસાનો ચઢાવો ચડાવવાનો રહે છે.

વહીવટદારનો સંપર્ક થઇ ગયા પછી તમારે જાજુ કશું કરવાનું રહેતું નથી. ડેકીવાળું એક સ્કૂટર કે સેકન્ડ હેન્ડ કાર ખરીદવાની રહે છે. આ કાર કે સ્કૂટરમાં તમે દારૂના હેરાફેરી આસાનીથી કરી શકશો. દારૂની એક બેટલ પર આસાની થી હેરફેર કરી શકો છે. અને એક બોટલ પર 100થી 200 રૂપિયા આસાનીથી કમાઇ શકાય એમ છે.

અલબત્ત અહીં એક ધ્યાન રાખવું પડે કે. જે તે વિસ્તારના વહીવટદારને તમે પુજાપો ચઢાવ્યો હોત તેની ટેરિટરીમાંથી બહાર ન નીકળી શકો. પણ ઓફિસમાં પંચીગ ટાઇમની ઝંઝટના રહે. જો ધઁધાનું વિસ્તરણ કરવું હોય તો બીજા પોલિસ સ્ટેશનના બીજા વહીવટદારને શોધી તેના પેટનો ખાડો કેટલો ઊંડો છે તેટલા રૂપિયા ઠૂંસવા પડે. ધંધો વિસ્તરતો જાય એટલે મલ્ટી લેવલ માર્કેટિંગની જેમ દારૂની હેરાફેરી માટે હાથ નીચે નાની ઉમરના માણસો રાખવા પડે, એને લેપટોપની બેગમાં દારૂની બાટલીઓની ડોર ટુ ડોર ડિલિવરી કરવા રોકવા પડે, આમ તમે ખુદ આ બિઝનેસથી બીજાને પણ રોજગારી આપી શકો.

આ ધંધાની બીજી મહત્ત્વની ખાસિયત એ છે કે, તમારા મોબાઇલ પર ખાસ કોડવર્ડ બનાવવા પડે. એટલે અહીં દારૂની હેરાફેરી માટે છગન જેવા શબ્દનો ઉપયોગ થાય છે. એટલે કે દારૂ પીધા પછી મગજમાં છ ગન (બંદૂકો) ફૂટતી હોય એવો અહેસાસ થાય છે. એટલે કોડવર્ડ છગન વપરાય છે. છગનની અટકના કોડવર્ડ પરથી દારૂની બ્રાન્ડ નક્કી થાય છે. છગન પરમાર એટલે મધ્યમ કક્ષાનો દારૂ હોય, જેમ કે બ્લેન્ડર સ્પ્રાઇડ, છગન પટેલ અને ટીચર્સ જેવી બ્રાન્ડ હોય તો છગન વાણિયા કોડ વર્ડ વપરાય છે. સ્કોચ માટે છગન બ્રાહ્મણ કોડવર્ડ વપરાય છે. તો પછી અને વોડકા માટે છગન નાગર શબ્દનો કોડવર્ડ વપરાય છે. કારણ કે મોટા ભાગે નાગર કાળો નહીં ગોરો જ હોય છે. એટલે આ શબ્દનો પ્રયોગ થાય છે.

તમારે આ ધંધાની શરૂઆત કરતી વખતે મોબાઇલમાં દારૂની બ્રાન્ડ સાથે છગન નામની સાથે અટક બોલવાની જેથી ગ્રાહક સમજી જાય અને એ પ્રમાણે ઓર્ડર આપે. પરંતુ હવે એકવીસમી સદીમાં ધંધાની સ્ટાઇલ પણ બદલાઇ છે. બ્રાન્ડેડ કપડાં સાથે કારમાં આવતો બૂટલેગર હવે ઘરે દારૂની ડિલિવરી કરે તો તે ગિફ્ટ પેકમાં કરે છે. જેના કારણે અડોશ પડોશમાં કોઇને શંકા ન જાય અને આસાનીથી દારૂની હેરાફેરી થઇ શકે.

ગુજરાતમાં છાશવારે દારૂની રેડ પડતી હોય છે. પરંતુ જો પોલિસને નૈવેધ બરાબર ચઢાવ્યું હોય અને ભક્તિ બરાબર કરી હોય તો ચિંતાને કોઇ કારણ નથી. કેમકે રેડ પાડતા પહેલા જ તમને જાણ કરી દેવામાં આવે છે કે બે ચાર જણાન દારૂ સાથે પકડવા પડશે.

અહીં તમારે બે ચાર જણાની એવી ફોજ રાખવી પડે જે દારૂ સાથે પકડાઇને પોલિસ સ્ટેશને જવા માટે તૈયાર હોય. આ ફોજ પોલિસની દારૂની રે઼ડ પડે ત્યારે હાજર હોય અને બે દિવસ જેનું ચક્કર કાપીને હવા ફેર કરી પરત આવી કામે લાગી જાય છે. અહીં અગત્યની વાત એ છે કે, તમારે પોલિસની સાથે સાથે રાજસ્થાન, મધ્યપ્રદેશ અને દીવ દમણથી દારૂ લાવનારા લોકો સાથે ખાસ સંબંધો રાખવા પડે. જેથી તમને સસ્તા ભાવમાં 27 ટકા ગાળેલો દારૂ મળી જાય અને પોલિસને  સાચવવા માટે આપવાના પૈસાનું માર્જિન બની રહે. એટલે જ ટેક્સ ભરાયા વિનાનો દારૂ જે રાજ્યમાં દારૂબંધી નથી એના કરતાં ગુજરાતમાં સસ્તો મળે છે.

પોલિસની રહેમનજર હોય તો આ ધંધામાં બરકતે ય ઘણી છે. કારણ કે નેવુંના દાયકામાં મેકડોવેલ કંપનીએ સૌથી વધુ દારૂ ખરીદનાર માટે મારુતિ કાર આપવાની સ્કીમ કરી હતી. એ વખતે દેશના બીજા કોઇ રાજ્યમાં એટલે દારૂ નહોતો ખરીદાયો કે કોઇ મારુતિ કાર જીતી શકે. પણ ખેડાનો બૂટલેગર આ કાર જીતી ગયો હતો. કારણ કે ગુજરાતમાં શુદ્ધ પાણી પીવું હોય તો તમે મોહતાજ છો. ઘરે આર.ઓ પ્લાન્ટ નંખાવવા પડે કે મીનરલ વોટરના બાટલા મગાવવા પડે છે. પરંતુ દારૂ આસાનીથી મળી જાય છે. એટલે જ ગુજરાતના દર દસમાંથી છ માણસ એવું કહે છે કે,..... તું આજે ય મારી એ તરસ છે, ...ગમે તેવી તોય તું બોટલ સરસ છે.

(નોંધઃપોલિસની રહૈમનજરથી થઇ શકતા આવા વ્યવસાયિક માર્ગદર્શન આપતા રહીશું.)