ગાંઠિયા ખાઇ શોભાના ગાંઠિયા બનેલા રૂપાણીની વાત કોઇ માનતું જ નથી, લો આ રહ્યો પુરાવો !

રંગુનથી રાજકોટ આવેલા રૂપાણીને જન્મથી જ શુક્રની તુલા રાશિ સાથે સંબંધ છે. રંગુન, રાજકોટ, અને રૂપાણી એટલે તુલા રાશિ. તુલા એટલે ત્રાજવું પણ રૂપાણી જૈન હોવા છતાં તુલા રાશિ પ્રમાણે ત્રાજવું તોલતા આવડતું નથી. કારણ કે રાજકોટમાં ગાંઠિયા ખાઇ એમાંનામાં ગાંઠિયાના ગની કુંભ રાશિ એવી ઘર કરી ગઇ છે કે, ખુદ સીએમ હોવા છતાં ન્યાયનું ત્રાજવું તોલવાના બદલે ન્યાયના નામે લેટર લખવા માંડ્યા છે..અહૌ આશ્ચર્યમ કે અહૌ વૈચિત્રયમ?
સવારે ઉઠીને પ્રધાન પ્રચારકને પૂછ્યા વિના પાણી નહીં પીવાનો નિયમ રાખનાર રૂપાણી ન્યાયનું ત્રાજવું તોલવાને બદલે લેટર લખવા બેસી જાય છે. એમના ભેજામાં રાજકોટના જોકરના ગાંઠિયા એવા ઘુસી ગયા છે કે, ગામને હસાવતા જોકરને પણ હસવું આવી જાય.
આવા તઘલખી કામ (સોરી,  ગાંઠિયા, ખાખરા ખાનારા તઘલખી નહીં અહિંસક હોય) માટે હમણાં હમણાં બઘવાયેલા રહેતા રૂપાણી કદરૂપા નિર્ણયો કરવા માંડ્યા છે. એનો ચોખ્ખો દાખલો દલિત સામાજિક કાર્યકર અને નિવૃત્ત સરકારી કર્મચારી ભાનુભાઇનો આત્મ વિલોપનનો પ્રયાસ છે. છેલ્લા કેટલાક સમયથી નિવૃત થયેલા દલિત નેતા ભાનુભાઇ પાસે કેટલાક અભણ ખેડૂતો આવ્યા. એમણે કહ્યું કે, સાહેબ બે પેઢીથી જે જેમીન પર ખેતી કરીએ છીએ તે સરકારે ખાલસા કરી દીધી છે. અમે બેરોજગાર થઇ ગયા છીએ. ઉંઝાની આસપાસ રહેતા 50 ખેડૂતોની જમીન અચાનક ગાંધીનગરના કલમના એક ગોદાએ ખાલસા કરી દેતા આ ગરીબો બેકાર થઇ ગયા હતાં. પરંતુ તકલીફ એ હતી કે, ઉત્તર ગુજરાતમાં ગાંઠિયાનું ચલણ લગભગ નથી. એટલે જોકરના ગાંઠિયા ખાઇ જોકર નહીં થયેલા ભાનુભાઇ વણકરે ગરીબ લોકોને બે પેઢીથી ખેતી કરતા હતાં તે જમીન પાછી અપાવવાનું નક્કી કર્યું.
એમના પેન્શનમાંથી આવતા અડધોઅડધ રૂપિયા આ ગરીબોને જમીન પાછી અપાવવા માટેની મહેનતમાં ખર્ચતા હતાં. જમીન પાછી આવે તે માટે સતત મથતા હતાં. ગાંઠના રૂપિયા (ગાંઠિયા નહીં) ખર્ચી ગાંધીનગરના ધક્કા ખાતા એક ટેબલથી બીજા ટેબલે ફરતા અને ચંપલ ઘસતા હતાં. સરકારી બાબુઓનું ગજવું ગરમ થતુું ન હતું એટલે એમને કોઇ સાંભળતું ન હતું. કારણ કે આ ગરીબોને બે પેઢી પહેલા સરકારી જમીન મળી ત્યારથી ખેતી કરતાં હતાં. અને પાણી પત્રકમાં નામ ન હતું એટલે જમીન પોતાના નામે ચડી ન હતી. કારણ કે અભણ ખેડૂતોને  આ વાતની ખબર જ ન હતી.
રૂપાણી સરકારના આંકડા પોતે કહે છે કે, ગુજરાતમાં માત્ર 12.3 ટકા ખેડૂતો જ ભણેલા છે. ઉંઝા ગામના આ ખેડૂતો તો 12.3 ટકા ભણેલામાં આવતા ન હતાં. એટલે ભાનુભાઇએ પેન્શનની આવકના અડધા રૂપિયા આમની પાછળ જમીન અપાવવામાં ખર્ચવાના શરૂ કર્યાં.
ધીરે ધીરે પૈસા ખૂટતા ગયા, પણ ન્યાય અપાવવાની આ લડાઇમાં ભાનુભાઇની હિંમત ન ખૂટી. એમણે લડાઇ બમણાં વેગથી શરૂ કરી. તો સરકારી બાબુઓએ પૈસા માગ્યા ભાનુભાઇએ 50 પરિવારો માટે આ લડાઇ લડવાનું ચાલું રાખ્યું પણ લાંચ ન આપી અને ભ્રષ્ટાચારમુક્ત પારદર્શક વહીવટવાળી આ સરકારમાં લાંચ વગર કામ જ થયુ નહીં. 50 ગરીબ પરિવારોની જમીન સરકારે ખાલસા કરીને લઇ લીધી. લોહી, પરસેવો પાડીને માંડ બે ટંકના રોટલા ભેગા થતાં 50 પરિવારોનો ભૂખથી પેટનો ખાડો ઊંડો થતો જતો હતો. ભાનુભાઇને થતું હતું કે, ભૂખથી આ પરિવારોનું પેટ સંકોચાઇને કરોડરજ્જુને અડી જશે પણ અડવાણી સ્ટાઇલની બંડીમાં ચમકતા રૂપાળાં રૂપાણીને કાગળો લખ્યા તો જવાબ પણ આવ્યા નહીં. પૈસા ન હતાં એટલે કાયદેસરની જમીન પણ ન મળી.
રોટલાના ટૂકડા માટે તરસતા 50 ગરીબ પરિવારોના આંસુએ ભાનુભાઇનું દિલ પીગળાવી દીધું પણ અડવાણી બ્રાન્ડ બંડી પાછળના ખાદીના ઝભ્ભા પાછળ રૂપાણીના દિલ પર કોઇ અસર ન થઇ. થાકીને એમણે કાગળ લખ્યો કે, જો ગરીબોને એમની જમીન પાછી નહીં મળે તો એ ખૂડતો સાાથે પાટણ કલેક્ટર કચેરીએ આત્મ વિલોપન કરશે. પણ આ વાંચીને ય રૂપાણીના હ્રદયમાં રામ ન વસ્યા. રામ મંદીર બન્યુ નથી તો રામ ક્યાંથી આવે? એટલે રૂપાણીએ 17-1-2018ના દિવસે પાટણ કલેક્ટરને કાગળ લખ્યો કે, ભાઇ આ ભાનુભાઇ આત્મવિલોપન કરવાના છે, તો ધ્યાન રાખજો અને એમની તકલીફનું શું થયું તે ઓનલાઇન મૂકજો.
આ લખ્યા પછી વિદેશ વિહારી પ્રધાન પ્રચારકના વાયરસવાળા વિજય રૂપાણી ગુજરાતના વિહારમાં નિકળી ગયા. (અહીં જૈન ધર્મના ચાતુર્માસના વિહારની વાત નથી) પણ અહિંસાને વરેલી જ્ઞાતિમાંથી આવતા રૂપાણીનું સાંભળે કોણ....એમણે પત્ર લખ્યો અને પાટણના કલેક્ટરે ફાઇલમાં મૂકીને અભરાઇએ ચડાવી દીધો. વાર્તા પૂરી...ભાનુભાઇ તો પાક્કા સેવાભાવી માણસ..એ પહોંચ્યા પાટણ કલેક્ટર ઓફિસે...એમના સાથીઓને પોલિસ પકડવામાં વ્યસ્ત રહી એવામાં ભાનુભાઇએ આત્મવિલોપન કરી દીધું.
ફાયર બ્રિગેડ, પોલિસ બધા સામે જ ઊભા હતાં. પણ ભાનુભાઇને બચાવવા જતા દાઝી ન જવાય એટલે કોઇ ઝડપથી મદદે દોડીને આવ્યું નહીં. ભાનુભાઇ ગંભીર રીતે દાઝી ગયા, 50 ગરીબ પરિવાર માટે લડતો માણસ ભડભડ સળગી ગયો અને સરકારી મશીનરી જોતી જ રહી ગઇ, તો રૂપાણી ગુજરાતમાં રખડતા રહ્યા, એમને ખબર પડી એટલે બીજા દિવસે ખાદીના ઝભ્ભા પાછળના દિલમાં સંવેદના તો ના પ્રગટી પણ સંવેદનાનો સંદેશો આપતા કહ્યું કે, ભાનુભાઇની સારવારનો ખર્ચ સરકાર ઉઠાવશે.
અરે વિજયભાઇ, તમે ક્યા દાનવીર કર્ણ છો તે આ જાહેરાત કરો છો. બે પૈસાની સંવેદના બચી હોત તો કહોને કે મુખ્યમંત્રીના પગારમાંથી સારવારના પૈસા આપીશ. બીજુ બધુ તો ઠીક મુ્ખ્ય મંત્રી ધારત તો જે કલમનો ઉપયોગ કરીને  ગરીબ લોકોની જમીનો છીનવી લેવાય છે, તે જ કલમનો ઉપયોગ ગરીબોને જમીન પાછી. અપાવવામાં પણ કરી શક્યા હોત.પણ બાર બાર ખાતાં ધરાવતા સીએમનું કોઇ માનતું નથી, નહીંતર કલેક્ટરે લેટર ફાઇલ કરીને અભેરાઇએ ન ચડાવ્યો હોત.
સરકારી તિજોરીમાંથી લોકોના પૈસા આપી વાહવાહી લૂંટવી છે. કારણ કે, 17મીએ નગરપાલિકાની ચૂંટણીમાં દલિતના વોટ જતા ન રહે. ભૂલ રૂપાણી કરે અને પૈસા પ્રજાના? રૂપાણીનું કોઇ અધિકારી સાંભળતું નથી એટલે જ એમના આ પત્ર પછી પણ અધિકારીઓ કોઇ ગરીબોના કામ કરતાં નથી. બનાસકાંઠામાં તો આખેઆખી કેબિનેટ લઇને ધામા નાંખ્યા હતાં ત્યાર પછી પણ ઉત્તર ગુજરાતની આ ઘટના કેટલી કમનસીબ છે.
ભાનુભાઇએ તો આ ફાની દુનિયા છોડી દીધી છે, પણ ભાનુભાઇને એટલું જ કહેવું છે કે, રૂપાણીના રાજમાં રૂપાળા થઇને રૂપિયા આપો તો જ કામ થાય છે. બાકી અધિકારીઓ પણ જેનું સાંભળતા નથી એની પાસેથી ન્યાયની શું કામ અપેક્ષા રાખો છો.? કારણ કે રૂપાણીનું ભાષણ સાંભળો ત્યારે પ્રધાનપ્રચારકની કોપી કરીને હાથ લાંબા ટૂંકા કરે ત્યારે મને તો બંગડી ખખડતી હોય એવો અવાજ આવે છે. એટલે જ ત્રાજવા જેવી તુલા રાશિમાં ન્યાય તોળતા આવડતું નથી કે ગરીબોને પરચૂરણ ગણીને ન્યાય તોળવાની તસ્દી લેવાતી નથી. અને આ બધી વાત પર પડદો ઢાંકવા રંગુનથી રાજકોટ આવેલા રૂપાણી સારવારના નામે સંવેદનાનો રંગ લગાવી રહ્યા છે.ત્યારે એક કવિતા યાદ આવે છે.

''ન દામન પર છીંટે, ન ખંજર પર કોઇ દાગ
યાર ખાદીવાલે, તુમ કતલ કરતે હૌ કે કમાલ કરતે હો''