આ ઉનાળામાં એ.સી ભૂલી જાવ, પંખો ચાલુ કરશો તો ય ગજવું કપાશે

આ ચૂંટણીમાં નર્મદાના નામે રાજકીય નાવડીમાં તરી જવા પાણી વેડફી નાંખ્યું. ખેડૂત અને પશુ પાલકોને ભૂલી જાવ. પણ આ ઉનાળામાં તમારા ખતરનાક રીતે કપાવાના છે. તમે ઘરે બેઠા હશો ને ગજવું કપાશે.

વાંચીને નવાઇ લાગે છે, પણ ગુજરાતના નેતાઓએ એવો ખેલ કર્યો છે કે, આ ઉનાળામાં એ.સી કરવું હોય તો દૂર રહ્યું, પંખો ચાલુ કરવો પણ ભારે પડી જશે. કારણ કે, દિલ્હી દરબારમાં કુર્નીશ કરીને રૂપાણી પાણી લઇ આવ્યાની વાર્તા માંડે છે, અડવાણી ડેવી કોટી પહેરીને છાતી કાઢીને કહે છે કે, કેન્દ્ર સરકાર ડેડ સ્ટોકમાંથી પીવાનું પાણી આપશે એ પાણી જુલાઇ મહીના સુધી ચાલશે.

પાણી વગરની રૂપાણી સરકારે ફરી પાછી એક વાર બધાની આંખમાં પાણીની છાલક મારી છે. પમ આ છાલક એકે એક ગુજરાતીને મોંઘી પડવાની છે. કારણ કે ગુજરાતને પાણી આપવા માટે નર્મદા ડેમની ઇરિગેશન બાય પાસ ટનલ ખોલવી પડશે. આ દરવાજા ખોલ્યા પછી ગુજરાતને પીવાનું પાણી મળશે. પરંતુ આ દરવાજા ખોલીને પાણી આપવા માટે રૂપાણી ગુજરાતીઓની પીઠમાં ખંજર ભોંકી રહ્યા છે.. અહિસંક રૂપાણીનો આ પ્રયોગ એકે એક ગુજરાતીના લોહી પાણી એક કરીને કમાયેલા પૈસા ખેંચી લેશે. કારણ કે ઇરીગેશન બાય પાસ ટનલ ખોલાશે એટલે નર્મદા ડેમમાં વીજળી ઉત્પન્ન કરતું કેનાલ હેડ પાવર હાઉસ બંધ કરવું પડશે અને વીજળીનું ઉત્પાદન પણ બંધ થઇ જશે.

નર્મદા ડેમના પાણીથી વીજળી ઉત્પન્ન કરવા માટે કેનાલ હેડ પાવર હાઉસમાં પાણી જવું જોઇએ અને નર્મદા ડેમની હાઇટ વધારીને 138 મીટર મીટર કરવાની મંજૂરી પણ એટલે જ મળી છે. કે એમાંથી વીજળી ઉત્પન્ન થઇ શકે. નર્મદા ડેમની ઇરીગેશન બાયપાસ ટનલ ખોલાય એટલે કેનાલ હેડ પાવર હાઉસમાં પાણી પહોંચે નહીં અને નર્મદા ડેમમાંથી આ પાવર હાઉસથી વીજળી પેદા નહીં થાય.

નર્મદા ડેમના દરવાજા બંધ થાય ત્યારે કેનાલ હેડ પાવર હાઉસમાંથી વીજળીનું ઉત્પાદન થાય છે. આ વીજળી મધ્ય પ્રદેશ અને મહારાષ્ટ્રને પણ આપવાની હોય છે. નર્મદા ડેમ બનાવતી વખતે થયેલા કરાર પ્રમાણે ગુજરાતે પાવર હાઉસમાંથી ઉત્પન્ન થતી વીજળી 50-50 મેગાવોટના પાંચ પાંચ યુનિટ કરીને 250 મેગા વોટના પાંચ પાંચ યુનિટ કરીને 250 મેગાવોટ વીજળી પડોશી રાજ્યોને આપવાની હતી. અને જો ગુજરાત વીજળી ના આપે તો એના પૈસા ગુજરાતે આ રાજ્યોને ચુકવવા પડશે.

ચૂંટણીમાં સૌની યોજના અને રીવર ફ્રન્ટ પર ટી.વી શોમાં દેખાડો કરવા અને સી પ્લેન ઉડાવવા માટે રીઝર્વ કરેલું પાણી વહાવી દીધું એટલે નર્મદા ડેમમાં પાણી નથી, એથી વીજળી પેદા નહીં થાય. આમે ય ગુજરાતને ઉદ્યોગ અને કૃષિ માટે બહારથી વીજળી ખરીદવી પડે છે એટલે પહેલેથી વીજળી મોંઘી જ છે. આથી નર્મદાની વીજળી નહીં મળે એટલે વધુ મોંઘી વીજળી બહારથી ખરીદવી પડશે. ઉનાળામાં ખેતી માટે પાણી નહીં હોય ત્યારે ખેડૂતો ભૂગર્ભ જળ ખેંચવા વીજળી વાપરશે અને ઉદ્યોગો તો વીજળી માટે મોં ફાડીને બેઠા જ છે. લટકામાં ઉનાળો આવે છે. એટલે ઘર વપરાશના પંખા અને એસીમાં વીજળીની માંગ વધશે. આ વધતી જતી વીજળીની માગને પહોંચી વળવા પાણી નથી એટલે રૂપાણી બહારથી વીજળી ખરીદશે.

આ વીજળી ખરીદવા માટેના પૈસા મારાને તમારા ગજવામાંથી ચુકવવા પડશે. વળી પાછો દુકાળમાં અધિક માસ તો એ થશે કે, મહારાષ્ટ્ર અને મધ્ય પ્રદેશને વીજળી નહીં આપીએ એટલે તેમને 16 ટકા અને 57 ટકા વીજળી એમને ભાગે આવે છે તેના નાણાં પણ ચુકવવા પડશે. એનો વધારાનો ખર્ચો પણ મારે અને તમારે આપણા ગજવામાંથી કાઢવો પડશે.

પાણીનું આવું મીસમેનેજમેન્ટ 17 વર્ષ પછી થઇ રહ્યું છે. ઇરિગેશન બાય પાસ ટનલ 2001માં પાણીની તંગી વખતે ખોલવામાં આવી હતી. ત્યારે નર્મદામાં વીજળી બનતી ન હતી. પણ વીજળીની તંગી નિવારવા ગુજરાતને વીજળી ખરીદવી પડતી હતી. એ વખતે ઉનાળામાં દરેક ઘરના વીજળીના બિલે બધાને રાતા પાણીએ રોવડાવ્યા હતાં. 2001 અને 2018ની વીજળીના ભાવમાં મોટો ફરક આવ્યો છે એ જાણીને નવાઇ લાગશે કે. 2001 કરતાં 2018માં વીજળી ખરીદવા માટે 27 ટકા વધારે પૈસા આપવા પડતા હતાં. અલબત્ત કેટલા પૈસા થશે. એનો કરોડો રૂપિયાનો આકડો બલોતા સરકારી બાબુઓ ગભરાય છે. તો મધ્યપ્રદેશ અને મહારાષ્ટ્રને વીજળીના કેટલા પૈસા ચુકવવા પડશે એ બાબતે હજુ મગનું નામ મરી પાડતા નથી.

તો અહિંસક રૂપાણીને આ વિશે પૂછ્યું  કે, અન્ય રાજ્યોને પૈસા ચુકવવાના થશે ? તો હિંસક હાસ્ય સાથે કહ્યું કે, એ બધુ જોયું જશે, અત્યારે તો પાણી મળ્યું ને?

હવે સરકાર આ વીજળી ખરીદવાના જે પૈસા થશે એ આ એપ્રિલથી અમલમાં આવનારા બજેટમાં આડા તેડા વેરાં નાઁખીને વસૂલ કરવાની છે. એટલા આ ઉનાળામાં એ.સી ચાલુ કર્યું તો વીજળીના બિલથી ગળું કપાશે અને પંખો ચાલુ કર્યો તો ખિસ્સું કપાશે. પરસેવો પાડીને ભેગા કરેલા પૈસા પર-સેવામાં જશે. ત્યારે પાણી વેડફ્યાની ફરિયાદ કરતાં કરતાં હિન્દીમાં લખાયેલો શેર યાદ આવી જાય છે.

‘’તું યે ના પૂછ કે, મેરી શિકાયતે કીતની હૈ

તુ અબ યે બતા ઔર કોઇ સિતમ બાકી તો નહીં હૈ?’’

નર્મદાના નીર નહીં હોવાથી હજું કેટલાં અને ક્યાં ક્યાં લૂંટાશો તે વાંચો આવતી કાલે?