રાજકારણીઓને લીલા લહેર , આપણે સેન્સેક્સ હોય કે સેક્સ બધે ટેક્સ

આજે સવારે મારી દિલ્હી ઓફિસ થી ફોન આવ્યો કે, દેશ માં 250 પોલિટિકલ પાર્ટી છે કે જે ચૂંટણી ઓછી લડે છે પણ પાર્ટી-ફંડ ના નામે કાળા નાણાં સફેદ કરી આપે છે. હમ ઉસ પર પ્રોગ્રામ કર રહે હૈ, પોલિટિકલ પાર્ટી કે રીએકશન ચાહિયે.

મેં અલગ અલગ પાર્ટી ના નેતાઓ ને ફોન કરવાનું શરૂ કર્યું , કોંગી નેતાઓ રાહુલ ગાંધી સેવામાં મહેસાણા હતા, ભાજપ ના બધા નેતા અચાનક અર્જન્ટ કામમાં આવી ગયા, મેં નાની નાની પાર્ટી ના નેતાઓને ફોન કર્યા, ફોન ઉઠાવતાની સાથે જ સામે છેડેથી જવાબ આવ્યો બોલો સાહેબ બહુ દિવસે યાદ કર્યા। મેં વિષય કહ્યો તો અમના અવાજ માં થી ઉમળકો જતો રહ્યો , મને કહ્યું "ભાર્ગવભાઇ અમદાવાદ ની બહાર છુ." બીજા એ બીજું બહાનું કાઢ્યું તો ત્રીજા એ ચોથું બહાનું કાઢ્યું.

ફોન કરી ને થાકી ગયો છેવટે નાની પાર્ટી છોડી  સમાજસેવા કરતા એક નેતાને મળ્યો, એમણે ખુલ્લેઆમ કહ્યું કે, "નાની પાર્ટી પાછલા બારણેથી બિલ્ડર અને ઉદ્યોગપતિઓને કમીશન લઇ કાળા નાના સફેદ કરી આપે છે, આ ધંધો જોઈ ને જ રાજકારણ છોડી દીધું છે." ઇન્ટરવ્યૂ પત્યો, કોફી પી ને છુટ્ટા પડ્યા, ત્યાં સુધી માં  સાંજ પડી ગઈ. એક મોટી પાર્ટી ના જાણીતા નેતા પણ અર્થશાસ્ત્ર ના નિષ્ણાંતનો ફોન આવ્યો , ભાર્ગવભાઇ મિટિંગમાં હતો, ફોન ન ઉઠાવાયો, બોલો શું હતું? મેં વિષય કહ્યો અને કહ્યું કે હવે ડેડલાઇન પતી ગઇ, ઇન્ટરવ્યૂનો કોઈ મતલબ નથી.

આ નેતાએ સામેથી કહ્યું, વાંધો નાઈ બહુ દિવસથી મળ્યા નથી કોફી પીએ. વસ્ત્રાપુર પાસેના કોફફીબાર માં અમે મળ્યા, કાળા નાણાની વાત થઇ,  વાત ચાલતી હતી ત્યાં મારા સી.એ।  નો ફોન આવ્યો, ભાર્ગવભાઇ તમારા રીટર્નમાં સહીઓ નથી થઇ અને નવા વર્ષ નું પ્લાંનિંગ કરવા, નવરા પડો એટલે ઓફિસે આવો.

મારું મગજ હવે દેશના અર્થકારણ, કાળું નાનું આ બધા વિષયો વિચારતું બંધ થઇ ગયું, જાન્યુઆરીમાં દોઢ  લાખના  નેશનલ સેવિંગ્સ સર્ટિફિકેટ કેવી રીતે લેવા, પત્નીના દોઢ લાખના નેશનલ સેવિંગ્સ સર્ટિફિકેટ કઈ રીતે લેવા, એ વિચાર માં પડી ગયો. ફોન પછી મને શાંત જોઈને આ નેતા એ પૂછ્યું કે, શું થયું?  કેમ સિરિયસ થઇ ગયા?

મેં કહ્યું, તમે મોટા અર્થશાસ્ત્રી છો પણ મારા જેવા નાના માણસ ને તો મુશ્કેલી જ છે. હું 30 દિવસ મજૂરી કરું, પગાર આવે એટલે ટેક્સ કપાઈ જ જાય. ચાલો , વાંધો નહિ. પણ હમણાં દિવાળી પછી બૂટ ખરીદવા ગયો. સેલમાંથી બુટ લીધા તો ય ₹600 વેટ ભર્યો.

સમજણ નથી પડતી કે 30 દિવસ હું મજૂરી કરું પગાર આવે એટલે, ટેક્સ ભરું પછી મોબાઈલ ખરીદું તો પણ ટેક્સ ભરવાનો. મોબાઈલનું બીલ ભરું, એમાં ટેક્સ ભરવાનો. ઘરે ફોનનું બિલ ભરું એમાં ટેક્સ ભરવાનો...ફ્રિજ ખરીદું... ટી.વી. ખરીદું એમાં ટેક્સ ભરવાનો....મેં  કાર ખરીદી,  એનો ટેક્સ ભરવાનો. પેટ્રોલ પુરાવું તો ટેક્સ ભરવાનો.... રોડ પર કાર ચલાવું તો એનો ટેક્સ ભરવાનો, લાયસન્સ બનાવવાનો ટેક્સ ભરવાનો. રેસ્ટોરન્ટમાં ખાવા ગયા તો ટેક્સ ભરવાનો,...ફેમિલી સાથે ફિલ્મ જોવા જવાનો ટેક્સ ભરવાનો...
આટલુ ઓછું હોય એમ નાગા તો ના ફરાય એટલે કપડાં તો પહેરવા જ પડે, કપડાં ખરીદો તો પણ ટેક્સ ભરવાનો, કરિયાણું ખરીદો તો ટેક્સ ભરવાનો, ખાવાનું બનાવવા માટે ગેસ લો, તો ટેક્સ ભરવાનો, ઘરમાં કોઇ બિમાર હોય તો તેની દવા પર પણ ટેક્સ ભરવાનો. પણ રોડ ટેક્સ ભર્યા પછી ખાડાવાળા રસ્તા પર તમારી ગાડીના જમ્પર ખરાબ થઇ જાય તો એનું કાઇ નહીં, પીવાના પાણી માટે ટેક્સ ભરવાનો પણ ચોખ્ખું પાણી પીવા ના મળે તો ઘરે આર.ઓ મંગાવો એના પૈસા આપવાના પણ શુધ્ધ પાણી આપવાની સરકારની જવાબદારી નહીં.
આટ આટલા ટેક્સ ભર્યા પછી અમને શું મળે.?...મેડિકલ સુવિધા ?  તો કહે ના, શુદ્ધ પાણી? તો ના, સ્ટ્રીટ લાઇટ? તો ખરાબ, સેન્સેક્સ વધે ને ઘટે,શેરબજારમાં કમાવ તો ટેક્સ અને નુકસાન જાય તો પણ ટેક્સ, તાણી તૂસીને ઘડપણ માટે બચત કરો અને તેના પર વ્યાજ મળે તો વ્યાજ પર પણ ટેક્સ ભરવાનો અને મળે તો શું? ઘરડાં થાવ એટલે ટેક્સ ભરીને મરી ગયા હોવ તો સરકાર તરફથી કોઇ સોશિયલ સિક્યોરિટી નહીં, આ ક્યાનો નિયમ? 10 રૂપિયાની કટિંગ ચ્હા આપવા વાળો અમારી જેમ ઇન્કમટેક્સ ન ભરે પણ ખેડૂત ઇન્કમટેક્સ ન ભરે પણ બજારમાંથી ખરીદી કરે ત્યારે સરકાર તો ટેક્સના નામે એના ગજવા પર પણ કાતર તો ફેરવી જ નાંખે છે. ટેક્સમાંથી કોઇ બચતું નથી. શ્વાસ લેવાનો ટેક્સ નથી એ સારૂં છે.
મારો ગુસ્સો જોઇ એ અર્થશાસ્ત્રીએ પોતાનું જ્ઞાન પાથરતા કહ્યું કે, ભાર્ગવભાઇ, સમજો દેશની વસતિ સતત વધતી જાય છેે. લોકોની જરૂરિયાત વધે છે. લોકોની સેવા માટે જ ને? દેશને વિચારતો કરો?
મે તેમને તરત સવાલ કર્યો કે સાહેબ મારા,....સંતતિ નિયમન માટે કરોડોની જાહેર ખબર આપો છો તો ય વસ્તી વધે છે. અરે એ તો છોડો લોકો તમારી જાહેરાતથી પ્રેરાઇને સંતતિ નિયમનમાં વપરાતા સાધનો પણ સંતાઇને ખરીદે છે. તમને ખબર છે ? સંતતિ નિયમનના સાધનો પર પણ ટેક્સ છે. તો ય વસ્તી વધે છે એનું શું? એને તો ગરીબો માટે બક્ષી દો તો કદાચ વસ્તી વધારો અટકશે. કારણ કે કારણ કે આ સાધનો સસ્તા થશે તો વસ્તી વધારો ઘટશે.
મારી આ દલીલ સાંભળી જાણીતા અર્થશાસ્ત્રી કમ રાજકારણી થોડા નારાજ થઇ નીકળી ગયા. પણ કોફી બારમાં બિલ મારે ચુકવવું પડ્યું. કેશ લેસ માટે કાર્ડ આપ્યું તો બિલ આવ્યું, એમાં પણ ટેક્સ લાગેલો હતો.
લો બોલો મારે મફતની સલાહ આપવાનો પણ ટેક્સ ભરવો પડ્યો. પણ એ નેતા કાર લઇને નીકળી ગયા ત્યારે મને થયું કે ભાઇ ચાલો માર્ચ આવે છે, આપણે હવે ઘરે જઇને બેન્કની પાસબુક જોઇને સાવ અમસ્તુ નિષ્ફળ નિષ્ફળ નાહક નાહક ટેક્સ ટેક્સ રમવાનું છે. પણ 1990માં સ્કૂટર પર ફરતા નેતાઓ આજે કરોડોના બંગલામાં  અને એસયુવી કારમાં ફરે છે, એમણે તો આરામથી ઉંઘવાનું છે.
જય હો ટેક્સ મહારાજ કી,
કારણ કે બ્લોગ લખવા પર ટેક્સ નથી એ બદલ સરકારનો આભાર,