પાછો આવીશ તારી પનાહમાં નોટબંધી....પહેલા બજારમાં મને પૂરો લૂંટાવા તો દે!

આઠ નવેમ્બરે વિપક્ષો ‘બ્લેક ડે’ ઉજવશે અને સરકાર ‘બ્લેક મની ડે’ ઉજવશે. પણ મારા અને તમારા જેવા લોકોએ તો આઠ નવેમ્બરે ‘ટીયર્સ ડે’ ઉજવવો જોઇએ. કારણ કે નોટબંધી હજુ પણ આપણને લોહીના આંસુએ રડાવી રહી છે.
એક વર્ષ પછી પણ નોટબંધીના ઘા રૂઝાયા નથી. કારણ કે નોટબંધી આવી ત્યારે દેશભરની 86 ટકા કરન્સી બંધ થઇ ગઇ હતી. બજારમાંથી રૂપિયા ગાયબ થઇ ગયા હતાં. એ વખતે તકલીફ એટલે ન લાગી કે મારી અને તમારી આંખોમાં સપનાના કાજળ અંજાયા હતાં કે આતંકવાદ ખતમ થઇ જશે. નકલી નોટોની ઝંઝાળ દૂર થઇ જશે. પરંતુ આંખનું કાજળ ગાલે ઘસાઇ ગયું. કારણ કે સુપ્રીમ કોર્ટમાં રિઝર્વ બેન્કે જે આંકડા આપ્યા તેનાથી બધા છક્કડ ખાઇ ગયા છે.

રિઝર્વ બેન્કે સુપ્રીમમાં કહ્યું કે, નોટબંધી પછી રૂ. 15.44 લાખ રૂપિયાની નોટો પાછી આવી છે અને હવે એના પર વ્યાજ આપવું પડે છે. બેન્કોનો નોટોનો એટલો બધો ભરાવો થઇ ગયો છે, કે વ્યાજનું ભારણ વધી ગયું છે....અને વ્યાજ ભારણના બહાના તળે સીધી કાતર મૂકાઇ ગઇ મધ્યમ અને ગરીબ વર્ગની પાઇ પાઇની પરસેવાની બચત પર...
દીવસ રાત કાળી મજૂરી કરીને ઇન્કમટેક્સ ભરતા અને વ્હાઇટની કમાણી  કરવાવાળા લોકોએ પોતાના ઘડપણ માટે અને સાથે સાથે ઇન્કમટેક્સમાં બચત થાય તે માટે પીપીએફ, એનએસસી જેવા સાધનોમાં રોકાણ કર્યું હતું એમાં વ્યાજ ઘટી ગયું. ભાઇ...આ બધા નાણાં તો નોકરિયાત અને મધ્યમ વર્ગના અને વળી પાછા વ્હાઇટના હતાં. બ્લેક મનીવાળો તો અહીં નાણાં રોકતો જ ન હતો.
આ આખી ય વાતમાં ખાટલે મોટી ખોડ એ આવી કે નોટબંધીથી કાળા નાણાં દૂર થશે, આતંકવાદ બંધ થશે એવી પ્રધાનસેવક...સોરી પ્રધાન પ્રચારકની પંચતંત્રની કથાઓ સાંભળી હતી. પણ બેન્કમાં 99 ટકા નાણાં જમા થઇ ગયા. એટલું જ નહીં કાશમીરમાં નોટબંધી પછી આતંકવાદી હુમલાઓ વધી ગયા અને બનાવટી નોટો ક્યાં ગઇ એ હજી ખબર નથી પડી.
હા..આ નોટબંધીમાં રાતોરાત લખપતિ..સોરી અબજપતિ બની હોય તો પેટીએમ સાથે જોડાયેલી ચાઇનાની કંપની. એમના વડાપ્રધાને અહીં આવી રિવરફ્રન્ટ પર હિંચકા ખાધા અને એના દેશને પૈસા મળી ગયા. ખેર, છોડો એ વાત...મૂળ વાત એ છે કે, જોર શોરથી પ્રચાર થયો કે, બધુ કેશ લેસ થશે....કાળાં બંધ થઇ જશે. લોકો કેશ લેસમાં ગયા...નોટબંધી પછી ઇ-વોલેટનો ઉપયોગ 64.77 ટકા થઇ ગયો. આશા હતી કે ઇ-વોલેટનો ઉપયોગ હજુ વધશે. પણ 2017ની સાલમાં ઇ-વોલેટનો ઉપયોગ સીધો ઘટીને 31.8 ટકા થઇ ગયો. બીજી તરફ લૂંટવા માટે એટીએમનો ઉપયોગ થવા માંડ્યો. પોતાની બેન્કના એટીએમમાં પણ ફ્રી ટ્રાન્ઝેક્શન પર મર્યાદાઓ આવી ગઇ. અને બેન્કો પોતાની મુન્સફી પ્રમાણે અમુક ટ્રાન્ઝેક્શન પછી મનફાવે તેવા ચાર્જ વસુલવા લાગી....હવે સામાન્ય માણસની તો સપનાં જોયાં પછી એવી હાલત થઇ ગઇ કે, આસમાન સે ગિરા ઔર ખજૂર પે અટકા....કારણ કે માંડ બે પૈસા બચાવીને બેન્કમાં એફડી કરાવી તો એફડીના વ્યાજ પણ ઘટી ગયાં. ગરીબોને બેન્ક સાથે  જોડવાની વાર્તા કરનાર સરકારની જનધન યોજનામાં ખૂલેલા ખાતામાં ગરીબ લોકોએ નોટબંધી . થતા જ 87000 કરોડ રૂપિયા જમા કરાવી દીધા. એમના વ્યાજ ચુકવવામા પરસેવાની કમાણીવાલા લોકોના એફ.ડીના વ્યાજ કપાઇ ગયા.
નોટબંધીની ફળશ્રૂતિ એ આવી કે લોકોની બચતો ઘસાતી ગઇ એટલે ગુજરાતી બચ્ચો પૈસા કમાવા શેરબજાર તરફ વળ્યો છે. નોટબંધી પછી શેરબજારમાં 34.88 લાખ કરોડ આવ્યા અને સેન્સેક્સ નિફ્ટી 22 ટકા જેવું વધી ગયા. હવે લોકોને શેરબજારમમાં લાડવા દેખાવા માંડ્યા છે. આ લાડવો લોકોને અનેક વખત ડાયાબિટિશ કરાવી ગયો છે તે કોઇને યાદ નથી.
રાજકારણીઓ...હારવાની બીકે નોટબંધીને કારણે ખેડૂત મર્યો, નાનો વેપારી મર્યો કહી ઉહાપોહ કરે છે. તો સરકાર બેહજારની ગુલાબી નોટ જેવું સપનું દેખાડે છે કે, અર્થતંત્ર મજબુત કરવા થોડી કડવી દવા પીવી પડશે. પણ સરકારમાં એકે ય ઇકોનોમિસ્ટ એવો નહીં હોય કે, જેને ખબર પડે કે કાળું નાણું તો સૌથી વધુ રિયલ એસ્ટેટમાં હોય છે....નહીં કે, મધ્યમ વર્ગે લોહી પાણી એક કરેલી બચતમાં...કે એની ઉપર વ્યાજ દર ઘટાડી દો...
નોટબંધી પછી આતંકવાદ ન ઘટ્યો, કાળું નાણું ન ઘટ્યું. નવી નોટોની પણ ડુપ્લીકેટ નોટો પકડવાનો નવો સિલસિલો પણ ચાલુ થઇ ગયો.એટલું જ નહીં બે પૈસા બચાવીને બેંકમાં મૂકીશું તો બે પૈસા વ્યાજના કમાઇશું એવી આશા પણ ઠગારી નીવડી. ત્યારે 100 વર્ષ પહેલા ગાલીબે પોતાની ગરીબી પર લખ્યું હતું કે,

‘’ગરીબી ઔર ખ્વાહીશે દોનો હી તુમ હો

 ખુદા મહેરબાન હો તો કોઇ એક પૂરી હોગી’’

પણ હું અહીં એને થોડી બદલીને મૂકું છું....કે....

‘’ગરીબી ઔર ખ્વાહીશે, દોનો હી તુમ હો

નોટબંધી કી મહેરબાની નહી હોતી તો એક પુરી હોતી.’’